Suara Timor Lorosae / Kuarta 07 Outobru 2009Dili, Komandante Jeral Polisia Nasional Timor Leste (PNTL), Komisariu Longuinhos Monteiro informa katak, Segunda (05/10) lider komunitaria husi Suku Goulolo (distritu Ermera) halao kampanha usa attributu partidu nian.
“Ami husu ba lider komunitaria karik kampanha la bele uza atributu partidu nian, dezisaun sira la halo tuir maka komando sei foti dezisaun ho forsa atu relata mai iha STAE tamba hahalok ne’ebe sira halo kontra lei STAE no CNE,” hateten Longuinhos Tersa horisehik.
Nia hatutan informasaun husi polisia Distritu Ermera ne’ebe agora tama iha komando hatudu katak kandidatu rua halao kampanha iha Goulolo uza atributu partidu nian. Medidas ne’ebe PNTL foti maka halao profimasaun pasifika atu husu ba kandidatu sira ne’e voluntariamente atu retira atributu nian durante sira nia kampanha.
Tuir koordenador CNE distritu Ermera, Lucia Lemos Salsinha liu husi telefone hateten katak atividade kampanha ba kandidatu rua ne’e sira laos uza atributu partidu maibe sira halao kampanha tamba besik bandeira Partidu Fretelin husi fatin kampanha.
“Ida ne’e ami identifika tiha ona katak kandidatu rua segunda liuba halao duni kampanha iha area ne’e laos uza atributu partidu maibe atributu ne’ebe iha kleur tiha ona iha fatin ne’ebe refere,” hateten Lucia.
Iha parte ne’e mos STL halao konfirmasaun ba iha Polisia Distritu Ermera , Adjunto PNTL, Jasinto Asuncao hateten mos katak informasaun ne’ebe halao husi kandidatu nain rua iha area Goulolo, Distritu Ermera uza duni atributu partidu maibe ida ne’e sei tama hela prosesu investigasaun. (Car)***
0 comments:
Post a Comment