Kandidatus Xefe Suku Gildapil Promete Fo Atensaun ba Idojos

Timor Post/ Kuarta, 07 Outobru 2009

Maliana, maski governo Aliansa Maioria Parlamentar (AMP) halao dadauk ona programa ajudus ba idojos (ferik-katuas) maibe iha parte seluk kandidatu xefe suku mos promete dadauk hela atu fo atensaun ba idojos sira bainhira hetan eleitu ba xefe suku.

Kandidatu nain tolu (3) ba xefe suku Gildapil, Sub-distritu Maliana, Distritu Bobonaro halo promesa ba komunidade iha suku bainhira halao kampanha. Kandidatu xefe suku Gildapil, Alfonso Pereira promesa katak bainhira nia eleitu sei implementa programa IV Governo Konstitusional no halao dezenvolvimentu inklui fo atensaun ba idojos (ferik-katuas) iha suku refere ne’ebe too agora seidauk simu osan karik.

Liu husi kampanha iha eskola Primaria nia oin iha Aldeia Atos, Suku Gildapil (01/09), kandidatu Afonso ho antusiasmu esplika ba populasaun sira katak bainhira nia eleitu buat ne’ebe maka nia hakarak atu hala’o maka hanesan hamoris programa ba atividade iha suku nomos hatutan planu husi programa governu nian ba iha suku no aldeia hotu.

Iha kampanha ne’e, Afonso mos promete ba joventude sira katak karik nia eleitu nia sei husu apoio equipamentus desportu no arte muzika ba governo especialmente Sekretariadu Estadu Desportu hodi bele fasilita atividade desportu no arte muzika ba juventude sira iha aldeia no suku Gildapil.

Afonso mos hateten, iha nia kampanha katak bainhira eleitu nia mos sei fo apoio ba atividade SISCA ne’ebe halao husi Ministeriu Saude nomos sei toma atensaun maka’as ba problema idojos ka ferik-katuas ne’ebe maka too agora seidauk hetan sira nia direitu hodi simu osan idojos ne’ebe governo fo.

Kandidatu Afonso mos promete katak karik nia eleitu nia sei la ses husi nia promesa no sei hamutuk ho komunidade no nia ekipa hotu hodi halao dezenvolvimentu iha aldeia no suku Gildapil liu husi kontribuisaun povo iha aldeia no suku Gildapil.

Entretantu kandidatu xefe juventude, Petros Bere iha kampanha ne’e haktuir katak karik nia eleitu hanesan xefe juventude nia mos sei apoiu xefe suku ne’ebe eleitu hodi hamoris atividade juventude ne’ebe maka durente ne’e la lao iha aldeia no suku Gildapil.

Petros mos haktuir katak karik nia eleitus hanesan xefe juventude nia sei koopera ho xefe suku no juventude sira hotu hodi halao atividade joventude nian iha aldeia no suku Gildapil inklui husu apoio ekipamentus despotus no arte muzika ba governo especialmente ba Sekretariadu Estadu Despotu para bele fasilita atividade desportu no arte muzika ne’ebe sira halao iha aldeia no suku Gildapil.

Iha parte seluk kandidatu xefe suku, Americo Pereira bainhira halao kampanha monolok iha suku Gildapil (02/10) haktuir katak bainhira nia eleitu nis sei hakbesik a’an povu hodi haree difikuldade no problema ne’ebe povu sira enfrenta hodi bele buka solusaun ne’ebe diak.

Kandidatu ne’e mos hateten katak programa importansia ne’ebe maka nia sei halao karik eleitu maka premeiru hametin unidade entre joventude no komunidade sira iha suku no aldeia sira. Segundu, hamoris atividade juventude iha suku no aldeia. Terseiro maka haree problema idojos sira nian ne’ebe too agora seidauk simu subsidiu husi governo.

Nune’e mos iha parte seluk bainhira halao kampanha monolok iha Eskola Primaria nia oin, aldeia Atos, Suku Gildapil, Kandidatus Aleixo da Costa (01/09) iha ninia kampanha promete katak karik nia eleitu nia sei tau matan ba problema idojos no alezadus ne’ebe too agora seidauk hetan subsidiu husi governo.

Aleinde ne’e nis mos sei hamoris atividade joventude iha suku no aldeia liu husi atividade desportu, arte kultural no arte muzika hodi hametin unidade entre joven iha aldeia no suku Gildapil.

Tuir observasaun diario ne’e, durante kampanha kandidatus sira hotu halao kampanha ho diak no lai iha konflitu, durante kandidatus sira halao kampanha hetan partisipasaun ne’ebe diak husi komunidade tomak iha suku ne’ebe refere. (Mjdistritu1)***