Mai Hamutuk Ho Ami, Vota Ba Kandidata Feto

Marcelina Punef, feto ida husi suku Abani, distritu Oecusse hanesan ezemplu diak ida ba feto maluk sira seluk liu-liu ba feto maluk potensial sira. Maski Marcelina rasik ho idade 63, nia la tauk atu bele kandidata no kompete ho mane sira iha Eleisaun Lideransa Komunitaria 2009. Depois passa husi apresentasaun kandidatura iha fulan kotuk, Marcelina tama hanesan kandidata ba posisaun xefe suku. Iha loron 9 Fulan-Outobru, nia tenke kompete ho kandidata sira seluk ho tatal hamutuk pakote 7.

Suku Abani hanesan suku ida husi Sub Distritu Pasabe ne’ebe isoladu liu, maizumenus 44 kilomentrus husi kapital distritu enclave Oecusse. Maski dook, suku Abani ho total aldeia 3 hanesan Pasabe, Naetuna no Haemnanu prontu tuir Eleisaun Lideransa Komunitarian ho total eleitor rihun tolu atus ualu resin hitu.

Suku Abani hanesan ezemplu diak ba partisipasaun komunidade iha atu uza sira nia direitu iha politika. Total pakote 8 ne’ebe atu kompete iha eleisaun loron 9 fulan Outobru sai hanesan prova konkritu husi prosesu demokrasia ne’ebe lao dadaun ona iha suku refere. Husi total pakote 8, feto nain 2 hanesan lideransa pakote ne’ebe atu kompete ba posisaun xefe suku nian. Husi ne’e hatudu mai ita, partisipasaun komunidade liu-liu feto sira mos maka’s atu bele partisipa iha dezenvolvimentu suku nian. Maski feto infrenta problema barak sira lideransa feto nain 2 la tauk hakat ba oin kompete ho pakote mane sira atu bele sai lidera komunitaria.

Marcelina Punef hanesan kandidata feto ida husi suku Abani mos prepara sira nia planu atu bele dezenvolvimentu suku nian. Periodu kampanha ne’ebe hahu husi loron 30 Fulan Setembru too loron 6 Fulan-Outubru hanesan opurtunidade ba nia atu bele fahe informasaun kona-ba ninia programa ba komunidade iha suku Abani.

Hatutan ba nia hanoin ho thema kampanha Centro Feto Enclave Oecusse nian ba Vota ba Feto, Vota ba Pas. Marcelina hateten katak nia hare asuntu Ppas ba komunidade laos uniku iha feto nia liman deit, maibe nia fiar katak liu husi lideransa ne’ebe feto sira iha hanesan inan no nudar feto ba komunidade, jeitu hamenus konflitu no resolve problema ho dame se sai hanesan dalan ba nia atu sai lideransa ne’ebe transforma komunidade.

”Mai hamutuk ho ami, vota ba kandidata Feto”, hakilar Marcelina hodi taka nia kampanha iha Aldeia Pasabe loron Sabadu 3 Outubru 2009.

Husi indikasaun dadus basea ba resultadu hatama pakote iha Eleisaun Lideransa Komunitaria 2009, pakote 8 iha suku Abani sai hanesan pakote ne’ebe ho montante boot liu kompara ho suku seluk iha Timor Leste. Pakote kandidatu husi suku Abani hanesan mos pakote uniku tamba kompostu husi feto rua sai lideransa pakote.

Centro Feto Enclave Oecusse rasik sei kontinua halao monitoring lalok kampanha durante loron 7 husi data 30 de Septembru ate data 6 de Outubru hodi fo kbiit ba feto sira liu husi sira nia kampanha.

Ba informasaun klaru liu tan bele kontaktu ba centrofeto_enclaveoecusse@yahoo.com