Mekanismu STAE Faila, Povo 30% Sei La Tuir Vota

Timor Post/ Kuarta, 07 Outobru 2009

Dili- Deputadu Parlamentu Nasional, Natalino dos Santos hateten katak tuir kalkulasaun povu kuaze percentu 30 sei la tuir Eleisaun Lideransa Komunitaria (ELK) iha 9 Outobru ida ne’e tamba failansu mekanismu ne’ebe STAE iha.

Failansu ne’ebe maka Deputadu Natalino dehan populasaun sira barak preokupa hela kartaun eleitoral tuan ne’ebe maka sira kaer seidauk troka. Nia konsidera problema ne’e hanesan failansu mekanismu husi STAE nian.

“Devide ke sira nia kartaun eleitoral ne’ebe kuak tiha ona maibe seidauk troka tamba ne’e hau fiar katak iha populasaun barak kuaze porsentu 30 sei la fo sira nia votus ba lideransa suku ne’ebe akontese iha hirak mai tan,’ informa nia ba jurnalista horisehik.

Tan ne’e maka nia husu governo atu hare mekanismu ne’e atu sai hanesan referensia hodi bolu atensaun ba diresaun STAE atu hadia mekanismu foun hodi prepara ba Eleisaun Kamara Municipio ne’ebe sei akontese iha tinan oin mai.

Nia dehan populasaun barak la troka sira nia kartaun eleitoral tamba durante ne’e STAE konsentra deit iha kapital Dili hodi la ba tuun iha base.(aga)***