PROFILE KANDIDATA FETO :

Cristalina Quintao, Kanditata husi Suku Railako Leten- Letefoho, Distritu Ermera

Baseia data husi STAE, lista pakote hamutuk 1208 pakote hanesan lista ne’ebe atu kompete iha Eleisaun Lideransa Komunitarian 9 Outobru oin mai. Husi total ida ne’e, feto hamutuk 42 sei kompete ho pakote mane sira atu bele manan sai xefe suku. Cristalina Quintao hanesan xefe suku aktual husi suku Railako Leten, Letefoho distritu Ermera mos la tauk atu kandidata an fali iha eleisaun tinan ida ne’e.

Bainhira hasoru malu durante treinamentu husi Projeitu UNDEF nian iha distritu Ermera nia hateten katak nia prepara ona programa 6 ne’ebe sai konsentrasaun ba nia serbisu bainhira komunidadae suku Railako Leten fo fiar ba nia sai fali xefe suku iha ne’ba. Iha eleisaun xefe suku 2005, Cristalina hetan fiar husi komunidade suku Railako Leten atu bele lidera suku refere. Durante tinan haat, nia serbisu makas atu bele servi ba povo, tau matan ba nesesidade povo nian nomos resolve problema ne’ebe iha suku no aldeia refere.

Ba kampanha eleisaun Lideransa Komunitaria tinan ida ne’e, Cristalina hatutan katak nia sei kontinua ho ninia programa uluk nia halao ona hanesan rehabilitasaun sede suku nian, programa bolsa da mae, loke eskola pre-sekundaria iha nivel suku nomos programa seluk.

Nia mos esplika kona-ba ninia programa ba futuru ne’ebe fo konsentrasaun ba area saude, kontinua bolsu de mae, bee mos no saneamentu ba aldeia ne’ebe seidauk hetan bee mos, hadia estrada, kontinua rehabilitasaun sede suku nian iha parte sentina no bee mos. Programa hirak ne’e sai konsentrasaun isu bainhira nia halao kampanha iha nivel suku no aldeia.***

Vota ba Feto - Vota ba Dame