Sunday, September 27, 2009

TRANSPORTE DIFIKULTA SERBISU STAE AILEU

0 comments
Suara Timor Lorosae, 28 Setembru 2009

Aileu – Assisten Administrasaun STAE Distritu Aileu, Victor Mendoza hateten durante ne’e transporte difikulta tebes ba sira nia serbisu iha area 135 aldeias iha Distritu Aileu tomak.

Oras ne’e dadaun sira iha deit kareta ida no motor rua. Ne’e la sufisiente ba sira hodi halao serbisu perkore ba iha Distritu Aileu tomak”, hateten Victoria Mendoca ba STL iha nia knar fatin foin lalais ne’e. Tamba kondisaun ne’e, nia propoin ba STAE Nasional para bele atende prekupasaun refere atu nune’e bele fasilita sira hodi prosesa lalais eleisaun suku.

“Ami propoin ba STAE Nasional atu fo resposta lalais ba perkupasaun ne’ebe agora dadaun ami infrenta tamba distansia fatin iha aldeia 135 dook ba malu. Kondisaun estrada mos la kondis ba transporte,” hateten Victor.

Iha fatin la hanesan, Administrador Distritu Aileu Martinho Siquera Matus rekonese duni katak maioria kondisaun estradas iha distritu refere agora la kondis tebes ba transporte. I nia rasik simu ona informasaun husi Administrador sub-distritu 4 katak too oras ne’e sira seidauk simu resposta husi Sekretariu Estadu Obras Publiku para atu hadia kondisaun estrada iha area ida-idak.

Ba problema refere, Matus promesa sei buka dalan para koordena ho Administrador Sub Distritu para oinsa bele kria serbisu voluntaria husi komunidade hodi hadia estrada ne’ebe kuak iha ida-idak area atu nune’e bele fo asesu ba eleisaun lideransa komunitaria iha fulan Outobru mai ne’e.

Komunidade Aileu, Joao Ximenes hateten nia parte sei la ba halao serbisu voluntaria hodi taka estrada kuak tamba governo iha orsamentu barak maibe agora governo seidauk book-a’an. Governu sei tuur deit iha fatin hodi garganta deit.

Entretantu total pakote Xefe Suku iha suku 31 kompostu husi Sub-Distritu 4 iha Distritu Aileu hamutuk 91 inklui kandidata feto ida husi suku Fahisoi, Sub Distritu Lequidoe no total Centru Votasaun iha Sub-Distritu 4 hamutuk 36, Estasaun Votu 42 no total eleitores hamutuk 22.868.

0 comments:

Post a Comment